Berriak

Gaur ari da Twitterren “Ask a curator” egitasmoa burutzen. Honen bitartez, Twioterreko erabiltzaileek bertan museoko profesionalei bere lanari buruz eta museo eta galeriei buruz dituzten ideiak, iritziak eta zalantzak azaltzeko aukera dute. Orain arte ikusitakoaren arabera, arrakasta handiko ekimena.

Jose Zugastiren Formaren garapena eskultura Donostiako hiriko ondare artistikoaren parte izango da hemendik aurrera: brontzezko artelana 5,10 m luze eta 3,40 m zabal da, eta 2,10 m goratzen da lurretik. Kutxa bildumakoa, lagapenean utzi zaio Donostiako Udalari.

Formaren garapena ikusgai egon zen 2009an kubo-kutxa aretoak antolatu zuen Ciria/Zugasti erakusketan. Eskultura Enpresa Zientzien Eskola ondoko lorategietan ezarri dute, Tolosa hiribidetik hurbil, Donostiako unibertsitate-eremuan. Inaugurazio ofiziala atzo goizean egin zen eta ekitaldian izan dira Jose Zugasti bera, Carlos Ruiz, Kutxako Gizarte eta Komunikazio Arloko zuzendaria, eta Denis Itxaso, Kultura eta Gazteria zinegotzia. Jose Zugasti Eibarren jaio zen 1952an eta Madrilgo San Fernando Arte Ederretako fakultatean ikasi zuen. Hainbat hiritan ikus daitezke haren obrak: Murtzian, Palman, Bilbon… Arkitektura-proiektu batzuetan aritu da lankidetzan eta hainbat erakusketatan parte hartu du, bakarkakoak nahiz kolektiboak. Zugastiren obrak bilduma publiko eta pribatu garrantzitsuetan daude gaur egun.

Informazio gehiago Kutxaren webgunean eta San Telmo Museoaren Flickr kontuan kokapena jasotzen duten argazkiak.

Abian da San Telmo Museoko Taberna-Kafetegia, terraza barne, eta beste espazio batzuetan antolatzen diren ekitaldietako catering zerbitzuak batera kudeatzeko prozedura ireki bidez eragile bat kontratatzeko lehiaketa.

Helburua da hiriko kultura, artea edo kultur turismoko ibilbideak ezagutu nahi dituzten herritar eta bisitarientzako erreferentzia-puntu eta elkartzeko gune bihurtzea; kalitate eta dibertsitate egokiak proposatu behar ditu, gastronomian zein eskaintzen dituen irudi, azpiegitura eta langileei dagokienez, eta ahalik eta bisitari gehienen eskura jartzea lortu behar da.

Azken finean, Taberna-Kafetegia museoan integratutako espazio gisa ulertu behar da, gainerako zerbitzuekiko osagarria; Museoko bisitariek etenaldi bat egiteko erabil dezaketen espazio bat da. Halaber, Museoaren programazioarekin eta gaiekin erlazionatutako jarduerak antolatzeko espazio bat ere bada.

Ondorioz, funtsezkoa da zerbitzu azkarra eta arina eskaintzea, eta inguru atsegina eta abegitsua osatzea bertan denbora-tarte luzeago bat igaro nahi duten guztientzat.

Informazio gehiago eta pleguak, hemen.

Donostiako Museoen sareak ponentzia bat aurkeztu berri du maiatzaren 27tik 29ra bitartean “Museos, espacios para compartir” izenburupean Valenciako IVAMean egindako museoen DEAC (Departamentos de Educación y Acción Cultural) direlakoen 16. jardunaldietan.

Museum Cementos Rezolako Amaia Llorente izan zen Donostiako Museoen Sarearen izenean (aipatutako Rezolak, Aquariumek, Chillida Lekuk, Elizbarrutiko Museoak, Real 100 Museoak , San Telmok, Untzi Museoak eta Zientziaren Kutxaguneak osatua) aurkezpena egin zuena, sareko beste museo gehienetako ordezkariak ere bertan zeudelarik. Sarearen ponentziak, “La red de museos de Donostia-San Sebastián: sueños y realidades” izenburuarekin, oso harrera ona izan zuen, beste museoek osatutako sareentzako elkarlan esperientzia gisa oso baliagarria iritzi baitzuten jardunaldietako parte hartzaileek.

Museoen Nazioarteko Eguna dela eta, San Telmo Museoaren Lagunen Elkarteak dohaintza bat egiten dio museoari urtero. Azken urteotan, dohaintza zein izango den erabakitzeko, irizpideetako bat San Telmok adierazitako ildoen barne kokatutako lana izatea izan da, euskal egileen bilduma osatzeko helburuarekin.

2010eko edizioan, San Telmo Museoaren Lagunen Elkartearen ekarpena Nicolás Lekuonaren lan batean gauzatu da. Egile honen ezaugarriak direla eta -gazte hil zen eta ez da maiz izaten bere lana erosteko aukerarik-, museoak lan hau bere Arte Ederretako bildumatan izatearen balorazio oso positiboa egiten du. Kartoi gaineko olio hau, “Sin título”, 1933. urtean egindakoa, elkarrekin erosi dute museoak eta Lagunen Elkarteak.

Eskuraketa honekin, San Telmo Museoak artista honen lanaren errepresentazioa osatzen du, aurretik bai baikenituen bere beste bi lan, 1935eko taula gaineko pintura eta urte bereko argazki-muntaia.

Bide batez, lan hau museoak izango duen erakusketa iraunkorraren parte izango dela azpimarratu behar dugu, Arte Ederren atalak Euskal Arteari eskainitako aretoan, Uzelay, Urrutia, Olasagasti eta Riberaren lanekin batera.

Gaur goizean aurkeztu da Donostiako Museoen Sareak aurtengo Nazioarteko Museoen Eguna dela eta antolatutako jarduera, prentsaurrekoan.

Sareak antolatutako jarduera bihar, larunbatean, burutuko da Gipuzkoa plazan, 18:00etatik aurrera. Bertan, Sebastopoleko Titiriteroek Museoen Olinpiada antzeztuko dute eta, gainera, 16:00etatik olinpiadaren hasiera arte, hurbiltzen direnen artean museoetara dohainik sartzeko aukera ematen duten 100 pasaporte banatuko dira, froga txiki bat eginez gero.

Aurkezpenean, bihar elkarrekin egingo ditugun jarduerez gain, museo bakoitzak maiatzaren 18a dela eta antolatutako ekitaldien berri eman da.

Informazio gehiago, hemen.

Gaur goizean aurkeztu da San Telmo Museoko irudi berria.

Euskal Herriko museorik zaharrenak, San Telmo Museoak, zaharberritze arkitektoniko, museologiko eta museografiko proiektua egin eta gero, etapa berri bat irekiko du.

Zaharberritzearen barne museoaren diskurtsoa ere eguneratu egin da. San Telmoko diskurtsoak gizabanakoa ardatz bezala edukiko ditu eta bisitariei euskal gizartearen historian eta kulturan zehar ibilbide bat egitea proposatuko die.

Pertsonak beraz, diskurtsoko protagonistak izango dira, eta objektuak gizabanakoaren gizarte bizitzaren lekukoak izango dira.

Aldaketa hau transmititzeko, irudi erakargarri eta argi bat izango du museoak. Irudiak, erakunde bezala, bere sendotasuna trasmitituko du eta aldi berean hiritarren pretzepzioan hurbila izango da.

26 proposamen onartu ziren irudi berria eskuratzeko egin zen lehiaketan eta Visual enpresari esleitu zitzaion.

Visualek aurkeztutako irudia orijinala da. Akronimoa erabiltzeak suposatzen duen xalotasunaren barne, hau osatzen duten hizkiak pertsonalizatu egin dira, bere identifikaziorako beste inongo erakunde edo entitatek berdinak izango ez dituela ziurtatuz.

Irudi berria osatzen duen STM akronimoak, bestalde, museoaren izen osoa modu irakurterrazean darama beti aldamenean. Bestetik, proposamenak museoak barne dagoen erakundeekin duen lotura kontutan hartzen du , Donostia Kultura eta hiriko udala, alegia.

Irisgarritasuna hobetsi egin da, bera gutxitu lezakeen inolako efekturik ez zaiolako gehitu irudiari eta erabilitako letra oso argia delako eta kontrastea handikoa.

Bestalde, museoaren irudi berria beste logoekin elkartzean nola funtzionatuko duen hoberen erakutsi duen proposamena izan da Visualena, etorkizunean egingo diren erabilera askoren adibideak jarriz.

Irudia beraz gainera, Visualen proposamenak lema bat darama: “Zatoz zugana”. Lema honek museoaren espiritua biltzen du, gizabanakoak San Telmon bere burua islatuta aurkituko duenaren ideia, bai objektuetan, bai gertaeratan eta baita biziko dituen esperientziatan ere.

  

 San Telmo Museoak gaur goizean 2008 eta 2009 urteetako eskuraketak aurkeztu ditu bere behin behineko egoitzan.Arte Ederren arloan lanak eskuratzerakoan euskal artearen bilakaeran garrantzia izan duten eta duten egileen lanak eskuratzea izan da lehentasuna.

Prentsaurrekoan Denis Itxaso Kultura Zinegotzia, Susana Soto, museoko zuzendaria eta museoari dohaintzak egindako pertsona eta enpresak egon dira.

Bestalde, 20ko eta 30eko hamarkadatan egindako kartelak ere eskuratu ditu museoak, euskal kartelgintzaren garai oparoenetakoak, alegia.

Etnografia alorrean, XX. mendeko kaleko bizitzarekin, merkataritzarekin eta enpresa munduarekin zerikusia duten objektuak bilatu dira.

Bestalde, 2009an museoak Donostiako merkataritzaren memoriaren errekuperazioa helburu duen proiektua abian jarri zuen, hiriko denden historia azalduko duten objektu, dokumentazio eta material grafikoa eskuratuz.

Proiektu hau dela eta hiriko hiru dendarekin harremanaten jarri da San Telmo: 2009an Hernani kalean zegoen Lasa-rekin; Otaegui gozodendarekin eta Benegas lurrindendarekin. Beraiei esker, objektu bilduma interesgarri batez gainera, dokumentazioa eta argazkiak ere lortu ditugu, eta arduradunekin bideo elkarrizketak grabatu ditugu.

Memoriaren errekuperazio proiektua Gipuzkoako enpresetara ere zabaldu da (Heineken España, S.A.; Irizar S. Coop.; CAF; etabar), orokorrean oso positiboki erantzun dutenak eta beraiei esker, alor honetan ere objektuak, dokumentazioa eta argazki bilduma interesgarriak eskuratu ditu museoak.

Bisitaldiaren ondoren, alkatea eta diputatua, komunikabideekin egon dira. Hemen, alkateak museoaren berrikuntzan Gipuzkoako Foru Ahaldundiaren laguntza eskertu egin du eta, aldi berean, 2011rako dagoen konpromisoa azpimarratu du, aldi baterako erakusketen finantzaketaren 50% bere gain hartuko baitu erakunde honek.

Bestalde, San Telmo Museoa gipuzkoar guztien ondarea denez, diputatuak berrikuntza proiektuarekin eta etorkizunean egingo diren jarduerarekin aldundiaren konpromisua adierazi du.