jarduerak

Bihar hasita eta abuztuaren 31ra bitartean Urgullen udako kanpaina abian izango da. Ohi bezala, mendiko hiru guneak –Natur Txokoa, Liburutegia eta Historiaren Etxea- irekita egongo dira ordutegi zabalarekin eta jarduerak egingo dituzte astelehenetik ostiralera 18:00ean.

Udako klasiko bihurtuta jadanik, programazioa hiru guneetan banatzen da astean zehar: astelehen eta ostegunetan Liburutegian, astearte eta astezkenetan Natur Txokoan eta ostiraletan Historiaren Etxean. Gainera, iaz hasitako proiektuarekin jarraituz, Napoleonen Bolborategian kanoien zaharberritzea egingo da jendaurrean uztailaren 21etik irailaren 2ra bitartean asteazken eta ostegunetan, Aste Nagusian ezik.

Autobus konpainiak Urgullera igotzeko zerbitzua martxan jarri du jadanik, 39 linearekin.

Jarduerei eta garraio publikoari buruzko informazio gehiago hemen.

Gaur goizean aurkeztu da Donostiako Museoen Sareak aurtengo Nazioarteko Museoen Eguna dela eta antolatutako jarduera, prentsaurrekoan.

Sareak antolatutako jarduera bihar, larunbatean, burutuko da Gipuzkoa plazan, 18:00etatik aurrera. Bertan, Sebastopoleko Titiriteroek Museoen Olinpiada antzeztuko dute eta, gainera, 16:00etatik olinpiadaren hasiera arte, hurbiltzen direnen artean museoetara dohainik sartzeko aukera ematen duten 100 pasaporte banatuko dira, froga txiki bat eginez gero.

Aurkezpenean, bihar elkarrekin egingo ditugun jarduerez gain, museo bakoitzak maiatzaren 18a dela eta antolatutako ekitaldien berri eman da.

Informazio gehiago, hemen.

Urte berezia izan da hau Urgulleko Aste Santuko eskaintzari dagokionean, denborarekin harrera hobeagoa eta sendoagoa lortuz doan jarduera bilakatu delako, lortutako emaitzak ikusita.

Izan ere, jarduera kopurua berdintsua izanik -batik bat haurrei zuzendutako 13 jarduera eskaini dira aurten Aste Santuan liburuen mundua, natura eta hiriaren historia ezagutu eta gerturatzeko helburuarekin- mendian irekitako hiru guneek jasotako bisitari kopuruak nabarmen egin du gora. 2008an hasi zenetik, guztira %187,9 igo da erabilera, eta aurten, martxoaren 29tik apirilaren 11ra bitartean 7.413 pertsona hurbildu dira hiru guneetara.

Historiaren Etxeko erakusketak, Liburutegiak eta Natur Txokoak osatzen duten eskaintza honetan bisitari kopuru handiena izan duena Historiaren etxea izan da, 5.484 erabiltzailerekin – 3.231 bisitari 2008an eta 4.980 iaz-.

Natur Txokoak eta Liburutegiak ere, bestalde, emaitza ezinhobeak izan dituzte. Natur Txokoak 1.084 erabiltzaile izan ditu aurten -329 bisitari 2008an eta 384 iaz- eta Liburutegiak 845 erabiltzaile izan ditu -384 bisitari 2008an eta 381 iaz-.

Hirugarren urtez jarraian, Urgull mendia Aste Santuko oporraldian gune erakargarria bilakatuko da.

Horrela, hiriko gune enblematikoetako bat balioetsi nahi da, berez gune erakargarria dena bertakoentzat eta bisitarientzat, Donostiaren erdian dagoen paraje naturala eta hiriaren gainean dagoen begiraleku pribilejiatua izateagatik.

Datu hauek kontutan hartuta, Urgulleko eskaintzaren inguruan egiten den balantzea oso positibotzat har daiteke eta jarduerak sendotzen doazela egiaztatu.

Martxoaren 18tik 21era, Donostiako museoen sareak (Donostiako Elizbarrutiko Museoa, Museum Cemento Rezola, Aquarium, Untzi Museoa, San Telmo Museoa, Chillida Leku Museoa, Zientziaren Kutxagunea, Real100) Ekimen Ozeanikoak direla eta jarduera bat antolatu du.

Programa ekologikoa Liburutegi Nagusiaren San Jeronimo Kaleko aretoan egingo da eta Surfrider Fundazioak bultzatua izan da, Donostia 2016an Europako Kultur Hiriburu izateko jardueren barruan kokatzen da.

Ekimena Donostiako hondartzetan jasotako hondakinekin erakusketa bat egitean datza. Horretarako, erakusketak eskatzen dituen pausoak jarraituz Hondakinaren Museoa sortuko dute parte hartzaileek.

Prozesua fasetan antolatuta egongo da eta ikasleak talde ezberdinetan banatuta prozesuen partaide izango dira. Talde bakoitzak fase bakar batean lan egingo du eta horrela taldeka lan egiten ikasiko dute.

Bukatzeko, ekimena publiko orokorrarentzat irekiko den erakusketa batean aurkeztuko da. Inaugurazio egunean, martxoaren 21ean, gure museoa Haizearen Orrazian kokatuko da eta Sebastopoleko Titiriteroetako aktore batek eguna alaituko du.

Ekimen honi buruzko informazio gehiago: Donostia 2016.

Aurten, Donostiako Museoen Sareak eta Plus 55 programak, lankidetzan, Gabonetako oporraldian zehar garatuko den programazio berezia eskaintzen dute, bilobak (6-11 urte) zaintzen dituzten 55 urtetik gorako aiton-amonei bereziki zuzendua. Izena emateko aukera dago hilaren 15, 16 eta 17an.

Jarduera honetan parte hartzen duten bikoteek Museoen Sarea osatzen duten zazpi museoak bisitatuko dituzte egun desberdinetan (Aquariuma, Elizbarrutiko Museoa, San Telmo Museoa, Chillida-Leku Museoa, Zientziaren KutxaGunea, Rezola Cemento Museoa eta Untzi Museoa). Bakoitzean bertako profesional batek gidatutako museo horretako gaiarekin lotura duen ekintza berezi bat egingo dute.

Parte hartzeko aurretik izena ematea beharrezkoa da eta hori abenduaren 15, 16 eta 17an egin daiteke oraindik Aieteko Topalekuan (María Fernández, 943-213863). 7€ ko kuota bat ordaindu beharko da pertsonako.

Informazio gehiago: 943-430051 (Amagoia, Untzi Museoa), asteartetik ostiralera 10:00-13:30h.

San Telmok, burutzen ari den birgaitze eta handiagotze proiektua ezagutzera emateko helburuarekin, Gipuzkoako arkitektoei zuzendutako bisitak antolatu ditu. Interes handia piztu du luzatutako deialdiak eta azaroan zehar burututzen ari dira bisitak, txanda desberdinetan eta proiektuaren zuzendaritza fakultatiboa daraman Miguel Ubarrechena arkitektoa, Nieto Sobejano estudiokoa, gidari dela.

Orain arte burutu diren bi bisitatan, arkitektoek hainbat galdera egiteko aukera baliatu dute, materialen aukeraketa eta mantenimendua, fatxadari buruzko xehetasunak, akaberak eta espazioen banaketa, besteak beste.

“Museoak, kultur ondareak eta toki garapenak” izenburuako kongresuan –Euskal Herriko Unibetrsitateak, Université Lumière Lyon 2 eta Oiasso Erromatar Museoak antolatua- parte hartzen zutela eta hirian bere presentzia baliatuz, munduko hainbat museotako ordezkariek San Telmoko lanetara bisita egin zuten Susana Soto zuzendariarekin pasa den ostiralean, urriak 30. Irakurtzen jarraitu

Ana Moreno, Thyssen Bornemisza Museoko   Hezkuntza arloko koordinatzaileetako bat, San Telmo Museoan izan zen ostiralean museoak gonbidatuta, lan jardunaldi batean parte hartzeko. Egun osoan zehar bere lan metodoak, atalen arteko harremanak eta koordinazioa, programa didaktikoak, beste erakundeekin burutzen diren akordioak etabar jorratu genituen.

Gaurtik aurrera, urriaren 1a Urgulleko Motako gazteluan ikusgai dagoen Donostiari begira erakusketaren ordutegia aldatu egin da.

Udaldia amaituta, Historiaren Etxean bisitari asko izan diren garaia, hau da indarrean jarri den ordutegia:

-Asteartetik ostiralera: 10:00-14:00 / 15:00-17:30

-Asteburu eta jaiegunetan: 10:00-17:30

-Astelehenetan itxita

Publiko orokorrarentzat irekita mantentzeaz gain, Urgullen inguruan egingo den eskaintza didaktikoak San Telmo Museoarena osatuko du, eta erakusketa edota mendia ikusteko bisitak badaude ere partikularrentzat, gutxienez 8 laguneko taldea osatuz gero. Harremanetarako: 943 428417 telefono zenbakia.